Efni og litir

Í þrívíddarprentun eru til margskonar efni sem öll hafa mismunandi eiginleika. Í þessari búð er ekki boðið upp á hvaða efni sem er í hvaða lit sem er, heldur stýrist framboðið af því hvaða efni eru tiltæk hverju sinni.

Að auki vil ég ekki bjóða upp á nein efni "blindandi" og án þess að vita hvernig þau koma út og stýrist því efnisval skv. því sem ég hef prófað sjálfur og þeim litum sem ég á til.

Ef það eru einhverjar sér óskir um aðra liti en þá sem boðið er upp á þá endilega senda fyrirspurn og ég mun skoða hvort viðkomandi efni sé fáanlegt.

Tiltæk efni og litir
Í sumum vörum er boðið upp á margskonar liti, einlita, tvílita, þrílita, glansandi, glimmer og aðra útlitseiginleika. Þau efni og litir sem boðið er upp á, þá hef ég átt á einhverjum tímapunkti. Sum efnin og sumir litirnir eru hugsanlega ekki tiltækir hjá mér þegar pöntun er gerð. Þau geta verið dottin úr sölu hjá framleiðanda eða ekki lengur til hjá endursöluaðila, annað hvort tímabundið eða varanlega.

Efni og litir á vörum eru því birt með þeim fyrirvara að þau séu tiltæk. Ef svo er ekki, þá mun verða haft samband við þig og við ákveðum í sameiningu hvort þú velur annað efni eða lit, eða þú bíður eftir að ég nái að útvega efnið ef það er tiltækt hjá endursöluaðila eða framleiðanda.

Málun hluta
Það er hægt að mála alla hluti sem eru þrívíddarprentaðir. Best er að húða fyrst með þunnu lagi af primer (nokkurs konar grunni) í spreybrúsa. Húðunin lokar örsmáu rifunum sem eru á þrívíddarprentuðum hlut og gerir málun auðvelda. Húða skal með þunnu lagi af primer og endurtaka svo aftur og aftur (bæta við fleiri lögum) ef þurfa þykir. Eftir það er hægt að mála. Fyrir suma hluti getur það verið gott að húða yfir málunina þegar henni er lokið til að hún varðveitist betur.

Ef ætlunin er að mála hlutinn, er gott að velja hann í þeim lit sem þægilegastur er fyrir málun.

Fyrir hluti sem pantaðir eru í tvílitu eða þrílitu er ekki skynsamlegt að yfirmála. Þá er betra að velja ódýrara einlitt efni og mála það svo.

PLA

PLA, eða inniefni eins og ég kalla það oft í búðinni, er þetta hefðbundna efni og er jafnframt ódýrast. PLA hefur lítinn sveigjanleika og er frekar brothætt. Efnið byrjar að linast við 50 gráðu hita og getur því tapað formi sínu.

PLA er því ágætist val fyrir hluti sem ekki þurfa að þola mikið hnjask, þar sem það á til að brotna ef það t.d. dettur í gólfið. Einnig þarf að hafa í huga að stilla ekki upp hlutum úr PLA þar sem sól skín beint á það og ekki heldur ef setja heita hluti í eða á hlutinn.

Óhætt er að þvo eða skola í köldu eða volgu vatni en passa upp á að þegar vatnið hitnar þá byrjar hluturinn að linast og aflagast þá auðveldlega.

HTPLA
HTPLA er sambærilegt við PLA en hefur meira litaúrval og aðra eiginleika við prentunina.

EPLA
EPLA er sambærilegt við PLA en hefur meira litaúrval.

PLA-SILK
PLA-SILK er sambærilegt við PLA en hefur meira glansandi áferð á tilbúnum hlut, ásamt því að litaúrval er allt öðru vísi en á hinum efnunum.

PLA-SILK er ég með hér í bæði tvílitu og þrílitu efni. Þráðurinn sem prentað er úr er þá samsettur úr tveimur eða þremur litum og áferð hlutarins, til viðbótar við að vera meira glansandi, er þannig að hlutirinn skiptir litum eftir því undir hvaða horni er horft á hann. Eins og gefur að skilja, þá er ekki hægt að stilla hvaða hlið sýnir hvaða lit undir hvaða horni, heldur ræðst það af því hvernig þráðurinn snýr við prentun á hverjum hluta. Þrátt fyrir það, þá skiptir hluturinn um lit þegar honum er snúið.

PLA-METALLIC
PLA-METALLIC er sambærilegt við hefðbundið PLA en yfirleitt er meira glimmer og glans í áferðinni.

XPLA
XPLA hefur svipaða eiginleika og PLA varðandi hitaþol, en þolir mun meira hnjask án þess að brotna. Hlutir úr XPLA myndu t.d. þola að detta á gólfið úr lítilli hæð alla vega.

PETG
PETG, eða útiefni eins og ég kalla það oft í búðinni, er sveigjanlegra, höggþolnara og hitaþolnara en hefðbundið PLA. Höggþolni (hversu brothætt efnið er) er áætlað svona mitt á milli PLA og XPLA.
Hitaþol er talsvert meira en PLA og hentar því vel fyrir hluti sem eiga að vera úti þar sem PETG þolir talsvert frost. PETG hentar þó ekki til að leggja frá sér heita potta og svoleiðis. Þvottur í uppþvottavél getur aflagað hlutinn en að þrífa í vel heitu vatni í stuttan tíma ætti að vera í lagi.

PLA-115
Þetta efni er sambærilegt við PLA nema hvað varðar hitaþol. Efnið þolir 115 gráður í skamman tíma og er því upplagt sem t.d. glasamottur, til að leggja frá sér heita bolla og slíkt, þar sem hitinn er ekki að fara mikið yfir 100 gráður.
Það skal hafa allan vara á, áður en þetta efni er sett í gegn um uppþvottavél og fer algerlega eftir uppbyggingu hvers hlutar hvort hann þolir það eða ekki. Undir flestum kringumstæðum er í lagi að setja í uppþvottavél, en prófanir sýna að vörur eins og Karfa með voronoi veggjum er gjörn á að verpast í slíkum þvotti.

PLA-160
Þetta efni er sambærilegt við PLA-115 en hefur enn hærra hitaþol og þolir upp í 160 gráður án þess að linast.
Þetta efni er því gott fyrir t.d. platta til að leggja heita potta og er einnig hentugt í glasamottur.
Þetta efni þolir meiri hita en PLA-115 efnin, en það skal samt hafa allan vara á, áður en þetta efni er sett í gegn um uppþvottavél og fer algerlega eftir uppbyggingu hvers hlutar hvort hann þolir það eða ekki. Undir flestum kringumstæðum er í lagi að setja í uppþvottavél, en prófanir sýna að vörur eins og Karfa með voronoi veggjum er gjörn á að verpast í slíkum þvotti.

Efni og litir

Modal Dialog Title